أرشيف كلمات الترانيم المسيحية | قاعدة بيانات الأناشيد الروحية على
الإنترنت
فهرس الترانيم | ترنيمة مكتوبة | نص الترتيلة
كلمات ترنيمة
يا رعاة سيبتوا الرعية
*
|
1- غنمى صبحت غنيمة
وفريسة للوحوش
هجموا عليها الديابة
ومحدش جيه يحوش
غنمى ف قلب الجبال
تايهه ومِتشَتِّتَة
يلسعها حر الصيف
والسقعة فى الشتا
القرار:
يارعاة سيبتوا الرعية ..
وبترعوا نفسكم
قرَّب يوم الحساب .. وهتستخبوا فين
ودينونتكوا جايه .. وياويلكوا كلكم
ومن النار والعذاب .. مين هينجيكوا مين
2- مريض وبقاله فترة
لا زيارة ولا إفتقاد
ومحدش عزى قلبه
ف كاس الألم إللى فاض
كام واحد مات م الوحدة
قبل أما يموت بجد
عاش يتألم بشدة
ومازارهوش أى حد
3- والمجروح إللى قلبه
تعبان مليان هموم
واقع ولا حد جنبه
ولا حدش قال له قوم
كام حد حزين ونَفسُه
صعبت جداً عليه
ومن حيرته ويأسه
أنهى حياته بإيديه
4- والمكسور إللى حِمله
قطم ضهره وحَناه
ومحدش جيه يساعده
ولا شال حمله معاه
كام واحد هَم كاسرُه
أو كاسر وسطه دين
ويوماتى تلاقى دمعُه
فى القلب قبل العين
5- والمطرود إللى طالع
من بيته بالدموع
ولا حد لصوته سامع
ولا ساعده على الرجوع
بيعيش ويموت غريب
ولا حدش يقبله
ويخبَّط عالبِبان
يلقى الناس يقفلوا
6- والضال وقت أما بيبعِد
بيردُّه تانى مين
مين بيفَهِم ويرشِد
الأمنا قليلين
ياما حِملان غلابه
فى الغابة إتقَطَّعوا
وإتَّاكلوا من الديابة
وكان ممكن يرجعوا
7- إفتكروا راعى صالح
كان بيجول يصنع خير
ماسَعاش ورا المصالح
ولا نام فوق الحرير
كان ويا الناس ومازال
عادل ومفيش فروق
من زهده ف جمع المال
إدَّى يهوذا الصندوق
8- إفتكروا راعى كان
مايحِبِّش الظهور
ملك من غير تيجان
وماسكنشى ف قصور
فى أى مكان ينام
باللبس إللى عليه
وماكانشى لِيه مكان
بيسند راسه فيه
____________________
* كلمات: رمزي بشارة – ترنيم: ساتر ميخائيل – مينا هشام –
مايكل عياد – سارة معروف – أبانوب مجدي – إيناس إيميل
* من وحي (حز 34)
