يسوع ماعاش كتير
كل اللي عاشه ٣٣ سنة
رغم ان لو هنحسب العمر من حيث الكيفية والموضوعية بعقليتنا احنا فهو يستحق يعيش ٨٠ و ٩٠ و ١٠٠ واكتر بكتير لان اللي عنده ميكفيش كل العمر ده .

لكن يسوع كان له حسبة تاني عملية جدا
يفهمها بتوع الادارة والقيادة الناجحين اوي
كل اللي كان في خطته كان بيترك خميرة تعيش للابد ..

فيه ناس بيعيشوا يأثروا تاثير رهيب جدا
لكن تاثيرهم بينتهي بمجرد ما يموتوا ..

علشان كدة يسوع كان عايش بعقلية مختلفة
انه يؤسس ارسالية ويعد لها قادة ويحط لهم المبادئ والقواعد والاسس ويوريهم نموذج علي نفسه
وبعدين يديهم القوة والامكانية والادوات والصلاحيات وبعدين يسيب لهم المفاتيح وهو ضامن ان مؤسسته ومملكته هتستمر للابد ..

علشان كدة كتير كان بيدربهم
ويؤهلهم انه معاهم زمن يسير وبعدين هيسيبهم بالجسد
فميتعلقوش بوجوده بالجسد .. لكن يكون ارتباطهم بيه من نوع اخر .

واللي عايز يؤسس خدمة مثمرة تستمر للابد حتي بعد موته للزم يمشي علي نهج يسوع (القائد الحقيقي)

القائد الحقيقي هو اللي يسيب وراه قادة
القائد الحقيقي لما يغيب مؤسسته ماتوقعش
لان سايب وراه ناس شربوا القيم والهدف بقوة

كتير بيدور في ذهني
هو حجم ارساليتي مرتبط بحجم عمري
يعني لو ارساليتي كبيرة ومتفرعة
هلاقي عمر يكفي ده ؟

في ظل شباب كتير وقادة مؤثرين
بتنتهي حياتهم علي الارض في عمر قصير ؟!!

وبلاقي الاجابة في يسوع
اللي عاش عمر قليل جدا من اقل الاعمار في الكتاب المقدس
لكن ترك وراه رسل وقادة والرسل تركوا رسل وسلموا لرسل وهكذا .

الفكرة تكمن في مرونتك انك تدي مساحة للاخر
ياخد مكانك و دفة قيادتك اللي هي في الاصل
نقطة تميزك وقوتك
او بمعني اصح يكون عندك الفكر ان شخص يقعد مكانك علي كرسيك ويكون احسن منك