تخيّل إنه إنت ملك، وجالك خبر إنه فيه جنود كتير جايين
علشان يحاربوك، مش بس كدة، الحرب دي مش مع جيش واحد
لكن مع ٣ جيوش مرة واحدة.
أكيد هتخاف وتتلخبط ويمكن تقرّر تستسلم.
يهوشافاط الملك عدّى بالخبرة دي، لكنه عمل حاجة مختلفة
. قرّر يدخّل ربنا في الموضوع. فجمع الشعب وصلّوا بثقة لله وقالوا له:
“أنت هو الله في السماء، وأنت المتسلّط على جميع ممالك الأمم.”
وربنا استجاب وردّ عليهم، وقالهم متخافوش الحرب دي في إيدي أنا.
خرج الشعب الصبح بدري، ومعملش أي حاجة غير أنه سبّح الله، وفجأة الـ3 جيوش دول ابتدوا الحرب، ولكن بدل ما يحاربوا جيش الله ابتدوا يحاربوا بعض.
المنطق بيقول 3 جيوش مع بعض يعني هزيمة أكيدة لشعب الله،
ولكن الله بيهزم حتى المنطق والعقل.
بشجّعك اليوم تحوّل عينك من على كلّ الصعاب اللي بتحاربك،
وترفعها على الله لأن الحرب مش بتاعتك لكن بتاعته هو.