هوشع النبي دا رجل تقي جداً، كلنا عارفينه ونسمع عنه.. بس ربنا لما وجهله رسالة ..كانت مختلفة جداً عن باقي الانبياء.. الله كلمه مش عشان يكلم اسرائيل ولا يبشر حد ولا يتنبأ علي امم او ممالك ولا يكتب رؤيا او حاجة من الكلام دا..

قاله روح اتجوز جومر.. “العاهرة” .. اللي مش هاتشرفك قدام الناس.. اللي هاتتعبك .. اللي هاتبذل مجهود مضاعف عشان توصلها حبك.. اللي ملهاش قيمة زي باقي البنات والعرسان مش بيتخانقوا عليها..

جومر يارب؟؟
طب ليه؟
طب رجولتي؟
طب سُمعتي؟
طب هيبتي وسط الناس؟
كان نفسي اتجوز واحدة الرجالة كلها تحسدني عليها.. كان نفسي لما ابقي ماشي معاها البنات كلها تغير منها ومن جمالها.. ولا اخلاقها.. ولا عيلتها.. ولا ايه ولا ايه… بس عموماً .. اللي تشوفه انت يارب!!

وفعلا تنازل واتجوزها.. وزي ما بيقولوا كدة “رضينا بالهم، والهم مش راضي بينا” .. جومر بقت تهرب منه.. تخيل هي اللي بتهرب، اصلها مش متعودة علي الحب النقي الثابت الهادي.. بتحب التنطيط والتغيير.. بتزهق.. لكن هو مازهقش. وكان كل مرة يروح وراها ويرجعها، وعمل اكتر حاجة صعبة هاتربطه بيها. خلف منها..

باختصار.. هوشع حبها لما مكنش في اي سبب يخليه يحبها.
حبها لما رمي الناس والتقاليد والسمعة والمنظر والشكل ورا ضهره..
حبها لما فضل الحب وقرر يسمع صوت الله وينسي احتياج الرجولة الاول “التقدير” منها ومن اللي حواليه..